Grásleppukavíar framleiddur úr hrognum frá Íslandi er kominn í verslanir í Svíþjóð, en Ísland er eina landið þar sem grásleppuveiðar eru stundaðar og hefur hlotið vottun MSC, að því er fram kemur á heimasíðu Landssambands smábátaeigenda.
Um er að ræða hrogn úr grásleppu sem veidd var í upphafi yfirstandandi vertíðar. Frakkar eru stærstu neytendur grásleppukavíars, en á eftir þeim koma Þjóðverjar og Svíar.
Sænskir neytendur geta því tekið gleði sína á ný og haldið áfram að kaupa grásleppukavíar. Mikil óvissa ríkti um áframhaldandi sölu í Svíþjóð því verslanir neituðu að eiga í viðskiptum með vöru sem væri á válista Alþjóðanáttúruverndarsjóðsins (WWF). Með vottuninni hefur þeirri hindrun verið rutt úr vegi, að því er fram kemur í Morgunblaðinu í dag.