McDonalds sakað um skattaundanskot

Framkvæmdastjórn Evrópusambandsins skoðar nú hvort hefja eigi rannsókn á skattamálum bandarísku skyndibitakeðjunnar McDonalds en því hefur verið haldið fram að fyrirtækið hafi á milli áranna 2009 og 2013 ekki greitt ríflega einn milljarð evra í fyrirtækjaskatt.

Margrethe Vestager, sem fer með samkeppnismál í framkvæmdastjórn ESB, segist vera að skoða ofangreindar ásakanir sem verkalýðsfélög hafa sett fram.

Félögin fullyrða að McDonalds hafi flutt tekjur, sem nema tæplega fjórum milljörðum evra, til dótturfyrirtækis í Lúxemborg, en þar starfa 13 manns. 

Greint er frá þessu á vef breska ríkisútvarpsins, en þar kemur jafnframt fram að forsvarsmenn McDonalds hafni þessum ásökunum. 

• Blogga um frétt