Landssamtök lífeyrissjóða hafa átt í viðræðum við Seðlabankann um að lífeyrissjóðum verði veitt leyfi fyrir einhverjum fjárfestingum erlendis.
Slík heimild væri til þess fallin að koma til móts við sjónarmið um nauðsynlega áhættudreifingu og draga úr hugsanlegum neikvæðum áhrifum sem geta fylgt því að lífeyrissjóðir fjárfesti eingöngu innanlands. Þetta kemur fram á heimasíðu sambandsins.
Undanþágan er þá einnig sögð vera til þess fallin að draga úr uppsafnaðri erlendri fjárfestingarþörf lífeyrissjóða þegar kemur að losun hafta.
Seðlabankinn hefur sýnt málinu skilning og tekið vel í þetta og eru nú taldar miklar líkur á að heimild verði veitt fyrir slíkri fjárfestingu seinni hluta þessa árs að því er segir í tilkynningunni.
Bent hefur verið á að uppsöfnuð fjárfestingarþörf lífeyrissjóðanna sé um 110 til 120 milljarðar króna um þessar mundir.
Í árslok 2013 áttu lífeyrissjóðirnir beint eða óbeint meira en 43% af skráðum íslenskum hlutafélögum og allt að 57% hlut í einstökum félögum. „Áframhaldandi vöxtur lífeyrissjóðakerfisins án erlendrar fjárfestingar verður til þess að sjóðirnir verða ekki lengur stórir fiskar í lítilli tjörn heldur stórhveli sem geta ekki hreyfst án þess að hafa veruleg áhrif á allt lífríki tjarnarinnar,“ sagði í skýrslunni „Áhættudreifing eða einangrun“ eftir Ásgeir Jónsson og Hersi Sigurgeirsson sem unnin var fyrir landssamtökin fyrr á þessu ári.