Tæplega 40% hluthafa þýska bankans Deutsche Bank neituðu að lýsa yfir stuðningi við æðstu stjórnendur bankans á aðalfundi hans í seinustu viku.
Málið hefur vakið mikla athygli í fjármálaheiminum. Samkvæmt samþykktum í lögum bankans þarf hluthafafundur að greiða atkvæði um hvort eigi að staðfesta ákvarðanir stjórnenda yfir síðasta ár.
Yfirleitt samþykkir mikill meirihluti hluthafa ákvarðanirnar, 89% í fyrra, en annað kom á daginn í seinustu viku.
Í frétt breska ríkisútvarpsins segir að stór hluti af hluthöfum bankans hafi áhyggjur af minni hagnaði, háum sektargreiðslum sem og áformum um endurskipulagningu bankans.
Lýstu margir hluthafar því yfir á fundinum að þeir bæru ekki lengur traust til yfirstjórnenda bankans.