6500 missa vinnuna vegna lækkunar olíuverðs

Shell olíufélagið ætlar að fækka starfsmönnum um 6500 í ár vegna lækkunar á olíuverði og vegna þess að útlit er fyrir að það takist að ljúka við yfirtöku á breska olíufélaginu BG.

Í tilkynningu frá Shell kemur fram að allt útlit sé fyrir að sú olíuverðlækkun sem einkennt hefur markaðinn undanfarið sé komin til að vera í einhver ár. Því verði brugðist við aðstæðum á markaði meðal annars með fækkun starfa. 

Fyrr á árinu var tilkynnt um yfirtöku Shell á breska keppinautnum BG og er yfirtakan metin á 47 milljarða punda, 9.833 milljarða króna. 

Í dag tilkynnti einnig annað orkufyrirtæki, breska fyrirtækið Centrica, frá því að fyrirtækið myndi fækka starfsmönnum um 4 þúsund og unnið væri að endurskipulagningu rekstrar. 

Olíuverð hefur lækkað mjög í verði frá því júní í fyrra og kostar tunnan af hráolíu um 50 bandaríkjadali um þessar mundir. Helsta skýringin er offramboð. 

• Blogga um frétt