Opna fyrsta sushivagninn á Íslandi

„Okkur langaði til þess að lækka verðið á sushimarkaðinum og gera fólki kleift að fá sér sushi oftar og á ódýran hátt,“ segir Hulda Björg Jónsdóttir í samtali við mbl.is, en hún opnaði í gær ásamt sambýlismanni sínum, Arnþóri Stefánssyni, og Lúðvík Þór Leóssyni fyrsta sushivagninn hér á landi.

Matsöluvagninn, sem ber heitið Shirokuma Sushi og selur ferskt og handgert sushi, er í Mæðragarði við Lækjargötu á besta stað í miðborg Reykjavíkur.

Staðurinn opnaði í gær og hafa viðtökurnar verið framar vonum, að sögn Huldu Bjargar. „Við erum alveg í skýjunum.“

Hún segir að þau hafi gengið lengi með hugmyndina í maganum og ákveðið loks að láta slag standa seinasta haust. Hófst undirbúningurinn fyrir alvöru um áramótin.

Sushistaðir hafa notið mikilla vinsælda á Íslandi undanfarin ár og hefur slíkum stöðum farið hratt fjölgandi. Hulda Björg nefnir að hugmyndin hafi verið sú að bjóða upp á fiskréttinn vinsæla á betra verði heldur en þekkist annars staðar. Þetta eigi að vera ódýr og hagkvæmur skyndibiti, sem fólk geti jafnvel gripið með sér úr vinnunni.

Á bak við sushi-ið standa þeir Arnþór og Lúðvík Þór, en þeir eru þaulreyndir í sushigerð. Arnþór er menntaður matreiðslumaður frá hótel- og matvælaskólanum í Kópavogi, en auk þess hefur hann starfað á fjölda veitingastaða hérlendis, eins og Vox, Turninum 19. hæð, Suzushii, Sushisamba og Sushibarnum, svo eitthvað sé nefnt.

Lúðvík hefur starfað við sushigerð frá árinu 2010 á Suzushii og Sushibarnum/Sakebarnum.

Þá sáu þeir félagar um að reka Suzushii í Kringlunni árin 2011 til 2015.

Facebook-síða Shirokuma Sushi

Af Facebooksíðu Shirokuma Sushi

• 1 blogg um fréttina

Bloggað um fréttina

• Njörður Helgason: Spennandi.