Jerome Kohlberg Jr., stofnandi fjárfestingafélagsins Kohlberg Kravis Roberts & Co, lést á heimili sínu í Massachusetts í Bandaríkjunum á fimmtudaginn, níutíu ára að aldri.
Fyrrum samstarfsmenn hans hjá KKR staðfestu fregnirnar í dag. Sonur hans James sagði við New York Times að Kohlberg hefði látist af völdum krabbameins.
Kohlberg hóf ungur að árum störf hjá fjárfestingabankanum Bear Stearns & Co. Tuttugu árum síðar, eða árið 1976, stofnaði hann sitt eigið fjárfestingafélag, KKR, í slagtogi með Henry Kravis og George Roberts.
Félagið er þekkt fyrir að hafa tekið yfir tóbaksfyrirtækið RJ Reynolds Nabisco, en yfirtökunni er lýst ítarlega í bókinni „Barbarians at the Gate: the Fall of RJR Nabisco“ en bókin fór sigurför um allan heiminn.
Kohlberg hætti störfum hjá KKR árið 1987, eftir að hafa lent upp á kant við meðeigendur sína, og stofnaði annað félag, Kohlberg & Company.
Hann fæddist þann 10. júlí árið 1925 í New York og var um skeið hermaður í bandaríska hernum, áður en hann útskrifaðist frá Harvard Business School og Columbia Law School.