Hagnaður Samherja 11,2 milljarðar

Hagnaður Samherja og dótturfélags nam 11,2 milljörðum króna á síðasta ári. Hagnaður samstæðunnar fyrir afskriftir og fjármagnsliði nam 16,4 milljörðum króna samanborið við 25,4 milljarða árið á undan en það ár nam söluhagnaður 8,1 milljarði króna.

Fram kemur í fréttatilkynningu frá Samherja að afkoma af reglulegri starfsemi í fyrra hafi því verið mjög svipuð og árið á undan. Hagnaður fyrir tekjuskatt nam 13,7 milljörðum og að teknu tilliti til tekjuskatts var hagnaður ársins 11,2 milljarðar króna sem fyrr segir. Rekstrartekjur Samherja og dótturfélaga voru rúmir 78 milljarðar króna á síðasta ári.

Eignir samstæðunnar í lok síðasta árs námu samkvæmt efnahagsreikningi samtals 116,2 milljörðum króna. Heildarskuldir og skuldbindingar á sama tíma voru 40,8 milljarðar og bókfært eigið fé 75,3 milljarðar króna. Eiginfjárhlutfall samstæðunnar var 64,8% í árslok. Veltufjármunir námu 36,7 milljörðum króna og peningalegar eignir umfram skuldir 4,2 milljörðum króna.

Fréttatilkynning Samherja

• Blogga um frétt