Deloitte sýknað af kröfu Toyota

Hæstiréttur staðfesti í dag dóm Héraðsdóms Reykjaness í skaðabótamáli sem Toyota á Íslandi höfðaði á hendur Deloitte, en Toyota taldi Deloitte hafa valdið fyrirtækinu tjóni vegna ráðgjafar og var krafist 31,7 milljóna í skaðabætur. Var Toyota aftur á móti dæmt til að greiða 2 milljónir í málskostnað, en áður hafði sú upphæð numið 1,5 milljónum í héraði.

Toyota taldi að Deloitte hefði valdið fyrirtækinu tjóni við ráðgjöf á svokölluðum öfugum samruna eða skuldsettri yfirtöku. Toyota byggði á svo­nefndri sér­fræðiá­byrgð, en í henni felst að sak­arregl­unni er beitt með strang­ari hætti en al­mennt ger­ist. Toyota hélt því fram að Deloitte hefði veitt sér­fræðiaðstoð við val á aðferð við samruna fé­lag­anna Ber­geyj­ar ehf. og P. Samú­els­son­ar hf. og skattskila hvað varðar frádráttarbærni vaxtagjalda í kjölfarið.

Deloitte mótmælti þessu og sagði að forsvarsmenn félaganna hefðu staðið að því að sameina félögin. Ágreiningslaust er í málinu að Deloitte gerði skattframtöl fyrir Toyota fyrir árið 2006 og að það hafi falið í sér að vaxtagjöld vegna lántöku við samrunann hafi verið gjaldfærð á móti tekjum. Í dómi Hæstaréttar segir hins vegar að skattframtalið hafi verið reist á ársreiknngi sem unninn var af Toyota og var á ábyrgð stjórnar og framkvæmdastjóra félagsins. Staðfesti dómurinn því niðurstöðu héraðsdóms og sýknaði Deloitte í málinu.

Félagið Bergey og móðurfélag þess, Smáey ehf., voru í eigu útgerðarmannsins Magnúsar Kristinssonar, en þau eru nú bæði gjaldþrota.

• Blogga um frétt