Hlutabréf Deutsche Bank ruku upp í morgun eftir gífurlegt fall í gær þegar gengi þeirra náði að lokum þrjátíu ára lágmarki. Bjartari horfur eru á evrópskum mörkuðum í dag þar sem fjárfestar í leit að góðum kjörum eru komnir á kreik.
Gengi bréfa Deutsche Bank fór upp um 14 prósent í morgun. Í frétt Financial Times er ástæðan rakin til fréttar sama miðils um að bankinn sé að íhuga stóra endurkaupaáætlun.
Fleiri félög tóku kipp í morgun en hlutabréf UniCredit í Mílanó fóru upp um 11 prósent, Société Générale upp um 6,8 prósent í París og Banco Santander í Madríd fór upp um 5,7 prósent.
Fjármálaráðherra Þýskalands, Wolfgang Schäuble og John Cryan, bankastjóri Deutache Bank, reyndu að róa markaði í gær og sagðist Schäuble ekki hafa neinar áhyggjur af bankanum. Þá sagði Cryan að staða bankans væri mjög örugg.