Gagarín hlaut gullverðlaun í flokki stafrænnar hönnunar í samkeppni á vegum European Design Awards 2016 fyrir orkusýningu Landsvirkjunar „Orka til framtíðar“ í Ljósafossstöð.
Tvö verkefni hlutu silfurverðlaun í sama flokki en það var gestastofa Google í Dublin og norðurljósaverkefni sem unnið var fyrir ferðagátt Noregs „Visit Norway“. Leturfyrirtækið Monotype hlaut bronsverðlaun fyrir gagnvirka leturinnsetningu.
Á vef Landsvirkjunar eru gestir leiddir inn í heim raforkunnar á nýjan og skapandi máta. Undirstöðuatriði rafmagnsfræðinnar eru útskýrð í gegnum einfaldar, skemmtilegar og fallegar tilraunir sem hafa leitt til mikilvægra skrefa í rafmagnssögunni.
Auk þess fræðast gestir um helstu orkuvinnsluaðferðir Landsvirkjunar; vatnsaflsstöðvar, jarðvarmastöðvar og vindmyllur. Enn fremur er orkuvinnsla og orkunýting sett í víðara samhengi og þróunin í heiminum skoðuð í samhengi við mikilvæga þætti svo sem endurnýjanleika og sjálfbærni. Sýningin var formlega opnuð á 50 ára afmæli Landsvirkjunar sumarið 2016 og er opin alla daga frá 10-17.
Gagarín og Tvíhorf arkitektar eru hönnuðir sýningarinnar og kom fjöldi fyrirtækja og sérfræðinga að sýningunni. Fyrr á árinu hlaut sýningin fyrstu verðlaun Félags íslenskra teiknara í flokknum „gagnvirk miðlun og upplýsingahönnun“.
EuropeanDesignAwards er samstarfsverkefni sextán evrópskra hönnunartímarita og níu bloggsíðna, sem öll eru leiðandi á sínu sviði og dómnefndina skipa fulltrúar þeirra. Fulltrúar Gagarín tóku á móti verðlaununum síðastliðna helgi á veglegri hátíð í Austurríki en þetta er þriðja árið í röð sem fyrirtækið er verðlaunað á þessari hátíð.