Reykjavík skilaði 490 milljóna afgangi

Almennur rekstur Reykjavíkurborgar sem fjármagnaður er af skatttekjum, þ.e. A-hluti, var jákvæður um 490 milljónir fyrstu sex mánuði ársins. Í fréttatilkynningu frá borginni kemur fram að hagræðingarvinna og hærri skatttekjur hafi skilað borginni jákvæðri niðurstöðu.

Í heildina var áformað að ná fram 604 milljóna króna hagræðingu borgarsjóðs á fyrri hluta ársins en aðgerðir skiluðu um 611 milljóna króna hagræðingu.

Í tilkynningu borgarinnar segir að rekstrarniðurstaða A-hluta hafi verið jákvæð um 490 milljónir króna en áætlun gerði ráð fyrir að hún yrði neikvæð um 300 milljónir króna á tímabilinu. Niðurstaðan er því 790 milljónum króna betri en gert var ráð fyrir.

Betri rekstrarniðurstaða skýrist að stærstum hluta af hærri skatttekjum, sem voru 554 milljónum króna hærri en áætlun gerði ráð fyrir og hagræðingarvinnu á fagsviðum borgarinnar sem skiluðu 611 milljónum króna á fyrstu sex mánuðum ársins.  Rekstrarniðurstaða fyrir fjármagnsliði var jákvæð um 844 milljónir króna en áætlun gerði ráð fyrir jákvæðri niðurstöðu um 281 milljón króna eða 563 milljónum króna betri en áætlun gerði ráð fyrir.

 Segir hagræðingarvinnuna að skila sér

„Það er ánægjulegt að sjá að sú hagræðingarvinna sem við lögðum í er að skila sér. Þá er líka gott að sjá að tekjur Reykvíkinga eru að aukast því það sýna hærri skatttekjur borgarinnar. Hins vegar verðum við að halda þétt um taumana því það má lítið út af bera í rekstrinum,“ er haft eftir Degi B. Eggertssyni borgarstjóra í tilkynningu. „Jafnframt er halli á fjárhagslegum samskiptum okkar við ríkið því miður áfram staðreynd og mikilvægt að fá bætt þar úr.“

Rekstrarniðurstaða samstæðu Reykjavíkurborgar, A- og B-hluta, var jákvæð um 10.561 milljón króna en áætlanir gerðu ráð fyrir jákvæðri niðurstöðu um 5.300 milljónir króna.

Rekstrarniðurstaðan er því 5.261 milljón króna betri en gert var ráð fyrir.

Heildarskuldir 289 milljarðar

Í tilkynningu borgarinnar segir að helstu ástæður fyrir þessu megi rekja annars vegar til hærri tekjufærðra matsbreytinga fjárfestingaeigna Félagsbústaða hf. og hins vegar lægri fjármagnsgjalda samstæðunnar vegna hagstæðrar gengisþróunar og lægri verðbólgu en áætlun gerði ráð fyrir. Rekstrarniðurstaða fyrir fjármagnsliði var jákvæð um 9.504 milljónir króna sem er 622 milljónum króna betri niðurstaða en áætlun gerði ráð fyrir.

Heildareignir samstæðunnar samkvæmt samanteknum efnahagsreikningi námu í lok tímabils  530,7 milljörðum króna, heildarskuldir ásamt skuldbindingum voru 298,6 milljarðar króna og eigið fé var 232,15 milljarðar króna en þar af var hlutdeild meðeigenda 12,9 milljarðar króna.  Eiginfjárhlutfall samstæðunnar fer hækkandi og er nú 43,7% en var 42,9% um síðustu áramót.

Heldur utan um rekstur fagsviða, Eignasjóð og Bílastæðasjóð

Rekstur Reykjavíkurborgar skiptist í A-hluta og B-hluta. Til A-hluta telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, sem heldur utan um rekstur fagsviða, Eignasjóð og Bílastæðasjóð.

Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu borgarinnar, en rekstur þeirra er að stofni til fjármagnaður með þjónustutekjum. Fyrirtækin eru:  Orkuveita Reykjavíkur, Faxaflóahafnir sf., Félagsbústaðir hf., Íþrótta- og sýningahöllin hf., Malbikunarstöðin Höfði hf., Slökkvilið höfuðborgar­svæðisins bs., Sorpa bs. og Strætó bs, auk Aflvaka hf. og Jörundar ehf.

• Blogga um frétt