Allt bendir til þess að það eigi eftir að draga verulega úr ferðalögum fólks vegna hryðjuverkaógnar næstu mánuði. Útlitið er verst fyrir Tyrkland en búist er við því að 52% færri ferðamenn komi þangað á fjórða ársfjórðungi samanborið við sama tímabil í fyrra.
Samkvæmt frétt BBC eru bókanir ferðamanna til Frakklands 20% færri nú en á sama tímabili í fyrra. Þetta kemur fram í gögnum frá Forward Keys, fyrirtæki sem sérhæfir sig í upplýsingaöflun í ferðaþjónustu.
Á fyrstu sjö mánuðum ársins jókst framboð á flugferðum til Spánar frá Bretlandi um 19% frá síðasta ári og Portúgal um 12%. Það er rakið til þess að fólk vilji frekar ferðast til landa þar sem hryðjuverkaárásir eru mun færri en í löndum eins og Tyrklandi og Frakklandi.
Samdrátturinn er áþreifanlegur í Frakklandi en frá ágúst 2015 til júlí 2016 fækkaði ferðamönnum um 5,4% og mun meira í París, eða um 7,5%. Á sama tímabili fækkaði bókunum til Tyrklands um 15%.
En staða Túnis fer batnandi eftir að ferðamönnum fækkaði um 39,4% á tímabilinu ágúst 2014 til júlí 2015 samanborið við árið á undan.