Hagnaður Arion undir væntingum

Hagnaður Arion banka á fyrri helmingi ársins 2016 nam 9,8 milljörðum króna samanborið við 19,3 milljarða króna á sama tímabili 2015. Höskuldur H. Ólafsson, bankastjóri Arion banka, segir afkomuna vera undir væntingum. „Grunnrekstur bankans gekk engu að síður ágætlega á tímabilinu en ytri aðstæður voru um margt óhagstæðar,“ segir hann í tilkynningu frá bankanum.

Arðsemi eigin fjár var 9,5% samanborið við 22,8% fyrir sama tímabil árið 2015. Hagnaður af reglulegri starfsemi nam 2,8 milljörðum króna samanborið við 7,8 milljarða á fyrri helming ársins 2015. Arðsemi eigin fjár af reglulegri starfsemi nam 2,8% samanborið við 9,8% á fyrri helming ársins 2015.

Höskuldur segir góðan vöxt hafa verið í útlánum, sérstaklega til fyrirtækja, en þau útlán jukust um 8% frá áramótum og hreinar vaxtatekjur jukust um 11%. „Aðstæður á fjármálamörkuðum á tímabilinu voru bankanum óhagstæðar. Þannig eru fjármagnstekjur, aðrar en sala Valitor á hlutabréfum í Visa Europe, undir væntingum okkar og er bókfært umtalsvert tap af hlutabréfaeign bankans í skráðum félögum. Arion banki sá um allar nýskráningar í kauphöll á árinu 2015 en engar skráningar hafa átt sér stað á þessu ári og hefur það áhrif á þóknanatekjur bankans,“ segir Höskuldur.

Heildareignir námu 1.035 milljörðum króna í lok júní samanborið við 1.011 milljarða króna í árslok 2015 og eigið fé hluthafa bankans nam 199,2 milljörðum króna í lok júní, samanborið við 192,8 milljarða króna í árslok 2015.

• Blogga um frétt