Stærsti viðskiptasamningur ársins

Bandaríski fjarskiptarisinn AT&T hefur tilkynnt um kaup sín á afþreyingarfyrirtækinu Time Warner. Kaupverðið er 86 milljarðar Bandaríkjadala eða 9.889 milljarðar íslenskra króna. Ólafur Jóhann Ólafsson er aðstoðarforstjóri Time Warner. 

Kaupsamningurinn var samþykktur af stjórnum beggja fyrirtækjanna í gær. Hann á þó enn eftir að fá samþykki samkeppnisyfirvalda. 

Í frétt BBC er haft eftir sérfræðingum að um stærsta viðskiptasamning ársins sé að ræða. 

Með kaupunum ætlar AT&T að tryggja sér efni til að streyma um net sín og þannig fá fleiri viðskiptavini.

Ólafur Jóhann Ólafsson er aðstoðarforstjóri Time Warner.

Ef samningur fær samþykki stjórnvalda mun AT&T fá fréttastöðina CNN og sjónvarpsstöðvar HBO undir sinn hatt. Einnig fylgir í kaupunum kvikmyndaver Warner Bros. 

Forstjóri AT&T, Randall Stephenson, segist ekki eiga von á neinum hindrunum frá stjórnvöldum fyrir samrunanum.

„Þetta er fullkomin pörun tveggja fyrirtækja með ólíka styrkleika sem geta náð ferskri nálgun á hvernig fjölmiðla- og fjarskiptaiðnaðurinn vinna fyrir viðskiptavini, efnisframleiðendur, dreifiaðila og auglýsendur.“

Í frétt BBC segir að líklegt sé að einhverjir muni gagnrýna samninginn þar sem AT&T sé nú þegar þriðji stærsti aðilinn á kapalsjónvarpsmarkaðnum í Bandaríkjunum.

Meðal þeirra sem hafa þegar gagnrýnt samninginn er forsetaframbjóðandi repúblikana, Donald Trump. Hann segist ætla að standa í vegi fyrir honum verði hann kjörinn forseti.

„Þetta er of mikil samþjöppun valds í of fárra hendur,“ sagði hann í gær.

Fleiri samrunar í uppsiglingu

Tíðindin þykja benda til þess að enn frekari samruna tækni- og afþreyingarfyrirtækja sé að vænta. Forstjóri Time Warner, Jeff Bewkes, hefur áður neitað að selja fyrirtækið. Hann hafnaði t.d. tilboði frá Twenty-First Century Fox Inc árið 2014.

• Blogga um frétt