Álögð gjöld á lögaðila á rekstrarárinu 2015 voru samtals 172,4 milljarðar samanborið við 183,8 milljarða árið á undan. Skýrist lækkunin af því að sérstakur skattur á fjármálafyrirtæki (bankaskattur) var ekki lengur lagður á slitabú fjármálafyrirtækja og því dregst sá liður frá, en hann var 25 milljarðar árið 2014. Þetta kemur fram í tilkynningu frá fjármálaráðuneytinu.
Stærstu liðir álagðra gjalda á lögaðila eru tekjuskattur og tryggingagjald, og aukast þeir báðir um rúm 9% frá fyrra ári og gjaldendum fjölgar talsvert. Sérstakur fjársýsluskattur, sem er sérstakur tekjuskattur á fjármálafyrirtæki, eykst um 12,9% milli ára þrátt fyrir brotthvarf slitabúa og fækkun gjaldenda úr tíu í átta, segir í tilkynningunni.
Álagður tekjuskattur fyrir árið nam 69,7 milljörðum og jókst um 9,3% milli ára. Á bak við gjöldin eru 18.418 fyrirtæki og fjölgaði þeim um 1.013 milli ára , eða um 5,8%. Skatthlutfallið er það sama bæði árin, eða 20%.
Álagning tryggingargjalds nam 82 milljörðum og hækkaði úr 75,1 milljarði árið áður. Það er um 9,2% hækkun milli ára. Gjaldendum tryggingargjalds fjölgaði um 801 milli ára eða um 4,5% og er það mesta fjölgun á einu ári sem sést hefur um árabil. Segir í tilkynningu að það kunni að vera til vitnis um uppgang í ferðaþjónustunni.
Lögaðilar bera almennt ekki fjármagnstekjuskatt. Þó skulu þeir lögaðilar sem eru undanþegnir almennri tekjuskattskyldu greiða 20% fjármagnstekjuskatt, eins og sveitarfélög og ýmis sjálfseignarfélög. Álagður fjármagnstekjuskattur á lögaðila nemur 1.363 milljónum sem er 77 milljónum lægri fjárhæð en á árinu 2015 og lækkar þannig um 5,3% milli ára.
Útvarpsgjald á lögaðila nam 612 milljónum sem er 4,4% lækkun milli ára. Skýrist það meðal annars af lækkun útvarpsgjaldsins úr 17.800 krónum í 16.400 milli áranna 2014 og 2015. Á móti kemur fjölgun um 1.336 á árinu.
Fjársýsluskattur, sem er innheimtur í staðgreiðslu, er nú lagður á í fjórða sinn. Álagningin nemur 2,9 milljörðum og nær til 145 aðila sem greiða laun í fjármálageiranum. Gjaldstofninn er allar tegundir launa eða þóknana fjármála- og tryggingafyrirtækja. Stofninn nam 52,5 milljörðum rekstrarárið 2015 og dróst saman um 0,2% frá fyrra ári. Skatthlutfallið var óbreytt frá fyrra ári, 5,5% og dróst álagður skattur því einnig saman um 0,2%.
Þá nam sérstakur fjársýsluskattur 6,8 milljörðum og var afsláttur vegna rannsóknar- og þróunarkostnaðar 1.167 milljónir og hækkaði um 150 milljónir milli ára. Þetta er í sjötta sinn sem afslátturinn er veittur og nýttu 98 fyrirtæki hann.