Krónan er farin að hafa áhrif á vöxt kvikmyndaiðnaðarins hér á landi, að sögn Leifs B. Dagfinnssonar, stjórnarformanns Truenorth.
„Meðan krónan var veik voru mikil tækifæri í geiranum hérlendis. Eins og staða krónunnar er í dag má segja að um rautt flagg sé að ræða fyrir kvikmyndaiðnaðinn á Íslandi.
Þetta slapp eins og gengið var á fyrsta ársfjórðungi 2016 en ekki lengur. Það sem þarf að haldast í hendur er hóflega sterk króna og svo frekari hvatar, eins og endurgreiðslukerfið vegna kvikmyndagerðar á Íslandi,“ segir Leifur í umfjöllun um þetta efni í ViðskiptaMogganum í dag.
Truenorth starfar nú í þremur löndum en stofnað var dótturfélag í Noregi fyrr á árinu. Þá var ferðavörumerkinu Discover Truenorth hleypt af stokkunum í þessum mánuði. „Þar erum við að skerpa á vöruþróun okkar og bjóða upp á persónulega þjónustu fyrir efnameiri einstaklinga og fyrirtæki,“ segir Leifur.