Verslunin RAM ehf. hefur verið úrskurðuð gjaldþrota en í Lögbirtingablaðinu í gær kom fram að skiptafundur í þrotabúinu færi fram 30. janúar.
Félagið hélt utan um rekstur samnefndrar verslunar sem stóð við Laugaveg 72 og samkvæmt skráningu félagsins var tilgangur þess sala á eldhúsáhöldum, matartengdum minjagripum o.fl.
Samkvæmt CreditInfo hafði félagið aldrei skilað ársreikningi.
Félagið var stofnað árið 2014 þá undir nafninu Þýðing ehf. en skipti um nafn stuttu síðar í Létthús ehf. Í maí 2015 var nafninu breytt í þriðja skiptið og hét eftir það Verslunin RAM ehf. Við stofnun voru það Hrafn Arnórsson og Guðjón Ingi Guðjónsson sem skipuðu stjórn félagsins en tæpu ári seinna tóku þau Svavar Halldórsson og Guðbjörg Fjóla Halldórsdóttir við félaginu. Svo virðist sem Svavar, sem er framkvæmdastjóri Landssambands sauðfjárbænda, sé kominn út úr félaginu en í gildandi skráningu félagsins er aðeins minnst á Guðbjörgu Fjólu.