Bakkavör á leið á markað?

Bakkavör stefnir nú á hlutabréfamarkað í Lundúnum ef marka má frétt The Sunday Times frá því á sunnudaginn. Bakkavör sem sérhæfir sig nú í framleiðslu tilbúinna máltíða, m.a. fyrir Marks & Spencer, Costa Coffee og Sainsbury er metið á hundruð milljóna punda samkvæmt heimildarmönnum The Sunday Times.

Bakkavör er í meirihlutaeigu bræðranna Ágústs Guðmundssonar og Lýðs Guðmundssonar, sem stofnuðu fyrirtækið á sínum tíma, og bandaríska vogunarsjóðnum Baupost Group en samkvæmt grein The Sunday Times eru báðir aðilar að íhuga sölu á Bakkavör.

Á heimasíðu Bakkavarar kemur fram rúmlega 18.000 manns starfi hjá fyrirtækinu um allan heim en fyrirtækið var stofnað árið 1986. Því er haldið fram í The Sunday Times að viðræður séu aðeins á byrjunarstigi. Bakkavör hagnaðist um 57 milljónir punda árið 2015 og var velta fyrirtækisins 1,7 milljarður punda.  

• Blogga um frétt