Konur hafa verið ráðnar í þrjár stjórnunarstöður í sádi-arabíska fjármálageiranum síðastliðna daga. Einn stærsti banki landsins, Samba Financial Group skipaði Rania Nashar sem bankastjóra á sunnudaginn. Þá hefur annar banki, Arab National Bank, ráðið Latifa Al Sabhan sem fjármálastjóra. Í síðustu viku var síðan greint frá því Sarah Al Suhaimi væri nýr forstjóri hlutabréfamarkaðar landsins.
Al Shuaimi er einnig framkvæmdastjóri fjárfestingabankans NCB Capital og hefur verið í þeirri stöðu í tæplega 3 ár en bankinn stýrir eignum sem nema rúmlega 20 milljörðum Bandaríkjadölum.
Sádi-Arabíski hlutabréfamarkaðurinn sem ber nafnið Tadawul er sá stærsti sinnar tegundar í Miðausturlöndum. Fyrirtækin þar eru metin á samanlagt 320 milljarða Bandaríkjadali.
Fyrrnefnd Nashar hefur starfað hjá Samba bankanum í 20 ár og unnið sig upp innan fyrirtækisins.
Í kjölfar lækkandi olíuverðs hafa Sádi-Arabar sett af stað metnaðarfulla efnahagsáætlun sem nær til ársins 2030. Hluti af þeim aðgerðum er að auka hlutfall kvenna á atvinnumarkaði landsins úr 22% í 30%.
Það að konur í Sádi-Arabíu sinni stjórnunarstöðum er hinsvegar ekkert nýtt en samkvæmt frétt CNN er það yfirleitt í gegnum fjölskyldufyrirtæki. Þrátt fyrir ráðningar síðustu daga eru hindranir á vinnumarkaðinum fyrir konur í landinu enn miklar. Þær mega til að mynda ekki keyra og þurfa leyfi frá karlmanni til þess að fara til útlanda.
Sádi-Arabíski prinsinn Alwaleed bin Talal kallaði eftir því í desember að konur í landinu ætti að fá að keyra. Breytingar á banninu eru ekki nefndar í nýju efnahagsáætluninni en þær eru taldar nauðsynlegar til þess að bæta efnahag landsins samkvæmt frétt CNN.