Tómas A. Tómasson, betur þekktur sem Tommi á Búllunni hefur boðið sig fram í stjórn Icelandair Group sem kosin verður á aðalfundi á föstudaginn. Sex eru í framboði en samkvæmt samþykktum félagsins skal kjósa fimm í stjórn.
„Nei, þetta er algjörlega að mínu eigin frumkvæði,“ segir Tómas aðspurður hvort hann bjóði sig fram fyrir ákveðna hluthafa í félaginu. „Ég hef áhuga á Icelandair Group, ég vann þarna sjálfur í mörg ár, hjá Loftleiðum. Ég þekki auðvitað ekkert annað en ferðamannaiðnaðinn og hótel- og veitingarekstur.“
Tómas segist hafa hugsað þetta framboð lengi eða í um tvö ár. Hann segir lítið vita um hvernig hann haldi að kosningin fari og segir hann að það verði bara að koma í ljós. „Það er fullt af góðu fólki þarna í framboði. Ég er svolítið óþekkt stærð sem maður í stjórn stórs fyrirtækis þó ég sé þekktur sem eitthvað annað.“
„Ég hef allavega skoðun og ferðast mikið,“ segir Tómas spurður hvort hann haldi að hann geti lagt eitthvað af mörkum í stjórninni. „Þetta er auðvitað spurning um að veita góða þjónustu og selja farmiða.“
Hin fimm sem gefa kost á sér eru Ásthildur Margrét Otharsdóttir, Georg Lúðvíksson, Katrín Olga Jóhannesdóttir, Ómar Benediktsson og Úlfar Steindórsson. Þau eru öll þegar í stjórn fyrir utan Ómar og Tómas.
Eins og fram kom í Morgunblaðinu í dag sækist Sigurður Helgason, núverandi stjórnarformaður og fyrrverandi forstjóri Icelandair ekki eftir endurkjöri og Magnús Magnússon ekki heldur.