Skóverslun sló öll met í fyrra þegar keyptir voru skór fyrir 8,2 milljarða króna en það er 6% aukning að raungildi frá fyrra metári, 2007. Fataverslun var enn u.þ.b. 11% minni árið 2016 en þegar mest var árið 2008.
Þetta kemur fram í nýrri greiningu Hagfræðideildar Landsbankans á verslun og þjónustu.
Hagfræðideild Landsbankans segir fréttir af dauða fataverslunar á Íslandi ótímabærar. Þegar litið sé á heildarmyndina er ljóst að fataverslun á Íslandi hefur aukist talsvert síðustu ár. Fataverslun velti alls um 32 milljörðum króna á síðasta ári samkvæmt gögnum Hagstofunnar, sem er 14% raunaukning milli ára.
Líklegt má telja að aukin verslun erlendra ferðamanna á útivistarfatnaði eigi talsverðan þátt í vaxandi fataverslun hér á landi síðustu ár á sama tíma og Íslendingar virðast kaupa sífellt meira af fatnaði í gegnum erlendar netverslanir og á ferðalögum erlendis.
Í greiningu Landsbankans kemur einnig fram að verð á barnafötum og kvenfatnaði hafi lækkað meira en verð á karlmannsfatnaði á síðustu árum. Þetta megi líklega rekja til aukinnar samkeppni og að opnun Lindex á Íslandi undir lok árs 2011 hafi væntanlega haft töluverð áhrif en verslunin selur ekki karlmannsföt.