Hlutabréf Haga hafa rokið upp í Kauphöllinni í morgun en hækkunin nemur 8,05% frá opnun markaða. Tilkynnt var um 9,6 milljarða króna kaup Haga á Olíuverzlun Íslands og fasteignafélaginu DGV ehf. í gær.
Þegar þetta er ritað nemur velta með bréfin 528 milljónum króna.
Hlutabréf Haga hafa á síðasta mánuði hækkað um 13,23% og á síðasta ári nemur hækkunin 10,27%.
Hagar hyggjast greiða fyrir Olís og DGV með útgáfu nýs hlutafjár og reiðufé. Þá er gerð tillaga um að enginn arður verði greiddur úr Höfum á árinu vegna viðskiptanna.
Finnur Árnason, forstjóri Haga, vísaði til breytts samkeppnisumhverfis í samtali við Morgunblaðið um viðskiptin. „Samkeppnisumhverfið hefur breyst mikið og mun stærri fyrirtæki eru að koma inn á markaðinn. Það krefst þess að íslensku fyrirtækin stækki og auki hagkvæmni í sínum rekstri. Það erum við að gera með þessum kaupum,“ segir Finnur.