Belgíska konungsfjölskyldan hefur haft samband við skyndibitakeðjuna Burger King vegna auglýsingar þar sem fólki er boðið að velja á milli Filippus konungs Belgíu og lukkudýrs Burger King.
Auglýsingin birtist m.a. á vefsíðunni whoistheking.be. Ef fólk smellti á teiknaða mynd af kónginum í auglýsingunni var spurt: „Ertu viss? Hann er ekki sá sem mun elda handa þér franskar kartöflur.“
Talsmaður belgísku konungsfjölskyldunnar segir að ekki megi nota ímynd fjölskyldunnar á þennan hátt nema fá til þess sérstakt leyfi. Ekki hafi verið beðið um slíkt í þessu tilviki. „Við erum ósátt við þessa nálgun,“ hefur BBC eftir talsmanni konungsfjölskyldunnar. „Þar sem þetta er auglýsing hefðum við aldrei gefið okkar leyfi.“
Í frétt BBC segir að talsmenn Burger King hafi ekki fengið vitneskju um að konungsfjölskyldan hefði lagt fram athugasemd.