Fasteigna- og leiguverð á höfuðborgarsvæðinu mun halda áfram að hækka á næstu misserum. Mikil spenna er á markaðnum og er takmarkað framboð meginskýringin.
Um þetta eru hagfræðingar sem rætt er við í Morgunblaðinu í dag sammála. Yngvi Harðarson, framkvæmdastjóri Analytica, bendir á að fasteignaverð hafi hækkað umtalsvert meira en leiguverð íbúðarhúsnæðis. Því sé undirliggjandi þrýstingur á enn frekari hækkun leiguverðs.
Ari Skúlason, sérfræðingur hjá Landsbankanum, telur aðspurður að vegna þessarar þróunar muni koma fram árgangar af ungu fólki á Íslandi sem eigi að jafnaði lítið eigið fé. Unga fólkið muni eiga erfitt með að kaupa húsnæði og leiguverð verða svo hátt að það geti lítið lagt fyrir.