Ræstu fyrsta Zipcar-bílinn við HR

Deili­bílaþjón­ustunni Zipcar á Íslandi var hleypt af stokkunum við Há­skól­ann í Reykja­vík í dag og varð Reykjavík þar með fyrsta borgin á Norðurlöndunum þar sem boðið er upp á þjónustu fyrirtækisins. 

Hug­mynd­in geng­ur út á að not­end­ur geti nálg­ast bíla til að nýta í stutt­ar ferðir og geta meðlimir Zipcar bókað bíl eftir þörfum með appi allan sólarhringinn. Bíllinn er bókaður með Zipcar-appinu og skilað aftur á sama stæðið þegar notkun lýkur. 

Fyrst um sinn verða fjórir Zipcar-bílar af gerðinni Hyundai i-10 aðgengilegir á sérstaklega merktum stæðum við Háskólann í Reykjavík og Landspítalann en búast má við fjölgun Zipcar bíla á næstunni þar sem búið er að sækja um séstök bílastæði fyrir bílana hjá Reykjavíkurborg í samræmi við nýlega samþykktan ramma um deilibílaþjónustu í borginni, að því er kemur fram í tilkynningu frá Zipcar. 

Fyrirtækið hefur undirritað samstarfssamning við Orku náttúrunnar um rekstur og umsjón hleðslustöðva fyrir Zipcar-rafbíla. Haft er eftir Áslaugu Thelmu Einarsdóttur, forstöðumanns einstaklingsmarkaða ON, að mikil ánægja sé samstarfið sem sé mikilvægt skref til þess að hraða þessari þróun. 

Greidd eru mánaðarlegt áskrifar­gjald, 500 krónur, og akst­ur­gjald fyr­ir hvern klukku­tíma sem bíllinn er nýttur en Zipcar sér um trygg­ing­ar, viðhald og eldsneyti.

Zipcar var stofnað um alda­mót­in en árið 2013 keypti Avis Budget Group fyr­ir­tækið fyr­ir 500 millj­ón­ir Banda­ríkja­dala. Síðan þá hef­ur fyr­ir­tækið verið í örum vexti og er nú með starf­semi í meira en 500 borg­um í Norður-Am­er­íku, Evr­ópu og Asíu. 

Draga úr útblæstri

Í tilkynningunni er vitnað í rannsóknir frá Bandaríkjunum sem munu hafa sýnt að hver deilibíll komi í stað 13 einkabíla á götunum og minnki því útblástur frá bílaumferð umtalsvert. Þá geti notendur sparað töluvert af eldsneyti og minnkað kolefnisfótspor sitt um allt að 500 kg ári. 

• Blogga um frétt