Dara Khosrowshahi, forstjóri leigubílaþjónustunnar Uber, hefur beðist afsökunar fyrir mistök af hálfu fyrirtækisins sem leiddu til þess að starfsleyfi þess í London verður ekki endurnýjað.
Samgönguyfirvöld í London hafa ákveðið að hafna beiðni leigubílaþjónustunnar Uber um endurnýjun starfsleyfis í borginni. Sadiq Kahn borgarstjóri hefur sagt að Uber hafi sett „ósanngjarnan þrýsting“ á samgönguyfirvöld með her af almannatenglum og lögfræðingum.
Í opnu bréfi sem fréttvefur breska ríkisútvarpsins BBC greinir frá segir Khosrowshahi að Uber ætli að áfrýja ákvörðuninni en viðurkennir jafnframt að fyrirtækið þurfi að breytast.
„Uber hefur bylt samgöngumáta fólks í borgum um allan heim en hins vegar höfum við gert mistök á leiðinni,“ segir Khosrowshahi, sem tók við störfum fyrir tæpum mánuði. „Fyrir hönd Uber biðst ég afsökunar á þessum mistökum.“