„Við erum að halda áfram að kasta hugmyndum á milli okkar, en það er ekkert nýtt að frétta,“ segir Gunnar R. Jónsson formaður samninganefndar flugvirkja. 13. samningafundur Flugvirkjafélags Íslands og Samtaka atvinnulífsins hjá ríkissáttasemjara var haldinn nú síðdegis.
Gunnar segir vissulega búnar að vera einhverjar þreifingar í gangi og menn séu að ræða saman, en ljóst sé að deilan leysist ekki í dag. Flugvirkjar hjá Icelandair hafa boðað verkfall næstkomandi sunnudag, 17. desember og segir Gunnar að öllu óbreyttu stefna í verkfall þá.
Ekki liggur enn fyrir hvenær næsti fundur verður haldinn.
Samningar flugvirkja við Icelandair losnuðu 31. ágúst og var kjaraviðræðunum vísað til ríkissáttasemjara 8. september.
Alls starfa 280 flugvirkjar hjá Icelandair og í heildina eru rúmlega 500 flugvirkjar í Flugvirkjafélagi Íslands.
Samningar flugvirkja við WOW air losnuðu í október og standa viðræður yfir vegna þeirra og hafa þær ekki ratað á borð ríkissáttasemjara.