Google þróar gervigreind í Kína

Tæknirisinn Google áformar að opna rannsóknarmiðstöð fyrir gervigreind í Kína þrátt fyrir að yfirvöld þar í landi hindri aðgang að leitarvél fyrirtækisins.

Þetta kemur fram í frétt breska ríkisútvarpsins BBC. Í yfirlýsingu frá Google segir að rannsóknarmiðstöðin verði sú fyrsta sinnar tegundar í Asíu en Google rekur fyrir tvær miðstöðvar af þessu tagi, eina í New York og aðra í London.

„Hvort sem það gerist í Kísildal, Peking eða annars staðar hafa framfarir gervigreindar í för með sér aukin lífsgæði fyrir allan heiminn,“ segir Fei-Fei Li, vísindamaður á gervigreindarsviði Google.

Yfirvöld í Kína tilkynntu áætlun í sumar þar sem lögð er áhersla á að ná Bandaríkjunum í þróun gervigreindar. Það hefur vakið áhyggjur mannréttindasamtaka sem telja að framfarir í gervigreind verði notaðar af kínverskum yfirvöldum til þess að herða eftirlit með borgurum.

• Blogga um frétt