Eftirlitsstofnun EFTA (ESA) ákvað í dag að vísa máli gegn Íslandi til EFTA-dómstólsins þar sem Ísland hefur ekki innleitt EES-löggjöf um rekstraraðila sérhæfðra sjóða innan tilskilinna tímamarka.
Í tilkynningu þess efnis er haft eftir Helgu Jónsdóttur, stjórnarmanni ESA, að tilkoma stöðugs og skilvirks innri fjármálamarkaðar velti á því að allir markaðsaðilar fylgi sameiginlegum reglum og eftirliti.
Tilskipun 2011/61/EU, og löggjöf sem byggð er á henni, kom á fót lagaramma um heimild og eftirlit með sérhæfðum sjóðum, sem innihalda m.a. vogunarsjóði og einkafjáfestingar.
Löggjöfinni var komið á sem svari við fjármálakreppunni og var markmiðið að skapa skýrt eftirlit til þess að tryggja alhliða og skilvirkt fjármálaumhverfi fyrir rekstraraðila sérhæfðra sjóða. Tilskipunina átti að innleiða inn í íslenska löggjöf fyrir 1. október 2016.
Þegar ESA vísar málum til EFTA-dómstólsins er það lokaskrefið í formlegu samningsbrotamáli, að því er kemur fram í tilkynningunni. Íslandi hefur áður verið veittur kostur á að koma röksemdum sínum á framfæri sem og að ljúka málinu með því að innleiða viðeigandi löggjöf innan gefinna tímamarka.