Hæstiréttur Íslands hefur vísað frá dómi meðalgöngusök Þorsteins Hjaltested á hendur Kópavogsbæ og tíu erfingjum Sigurðar Hjaltested.
Ættingjarnir tíu reka mál gegn Kópavogsbæ. Þess er krafist að bærinn verði dæmdur til að greiða dánarbúinu 74.811.389.954 krónur þar sem Kópavogur hefði fjórum sinnum tekið eignarnámi hluta af jörðinni Vatnsenda án þess að greiða eignarnámsbætur til dánarbúsins sem ætti beinan eignarétt að jörðinni en Kópavogur hefði eingöngu greitt umsamdar eignarnámsbætur til eigenda óbeins eignaréttar að jörðinni.
Kópavogsbær tilkynnti í janúar að Þorsteinn Hjaltested hefði með meðalgöngustefnu höfðað mál á hendur Kópavogsbæ en það snýst um að aðili geti gengið inn í dómsmál annarra. Var dómkrafa Þorsteins á hendur bænum að fjárhæð 27.541.702.570 kr.
Eins og áður segir hefur Hæstiréttur Íslands nú vísað kröfum Þorsteins frá dómi. Er Þorsteini gert að greiða málskostnað Kópavogsbæjar og annarra sem hann stefndi.