Hvetja konur til að klæðast svörtu

Stjórn FKA, Félags kvenna í atvinnulífinu, hvetur allar konur í íslensku atvinnulífi til að klæðast svörtu miðvikudaginn 31. janúar nk. Með þessu er markmiðið að konur sýni samstöðu sína og stuðning við #metoo-byltinguna.

„Nú þegar hefur fjöldinn allur af hugrökkum konum stigið fram með sínar sögur. Þetta eru konur á öllum sviðum atvinnulífsins á öllum aldri og alls staðar af landinu. Engin þessara kvenna stendur ein í sinni baráttu því að í #metoo stöndum við konurnar saman sem ein heild. Og í þetta sinn þarf samfélagið að skilja að okkur er full alvara með að hér muni ná fram að ganga, varanlegar breytingar í viðhorfum og valdbeitingu. Þess vegna klæðumst við konurnar svörtu þann 31. janúar næstkomandi,“ er haft eftir Rakel Sveinsdóttir, formanni FKA, í tilkynningu frá samtökunum.

Viðurkenningarhátíð FKA verður haldin 31. janúar, en það er stærsti viðburður félagsins ár hvert og vill stjórnin með vali sínu á degi undirstrika hve mikilvægt það sé að #metoo-byltingunni verði fylgt eftir í orði, í verki og af þeirri virðingu sem hún á skilið.

• Blogga um frétt