Bandarísk stjórnvöld hafa samþykkt umdeild innflutningsgjöld á innfluttar þvottavélar og sólarrafhlöður. Ákvörðunin er í anda viðskiptastefnu Donald Trump Bandaríkjaforseta, „Bandaríkin fyrst“ sem verja á innlenda framleiðslu fyrir erlendum keppinautum.
BBC hefur eftir talsmanni Bandaríkjastjórnar að stjórnin muni „ávallt verja bandarískt verkafólk, bændur, stórbændur og kaupsýslumenn“.
Stjórnvöld í Kína og Suður-Kóreu hafa hins vegar gagnrýnt ákvörðunina, enda mun hún hafa hvað mest áhrif á þarlend fyrirtæki. Bandarískir ráðamenn segja hins vegar von á frekari viðskiptahindrunum.
Frá því hann settist á forsetastól þá hefur Trump rætt um að grípa til aðgerða gegn erlendum fyrirtækjum. Í innsetningaræðu sinni í fyrra hét hann því að verja landamæri Bandaríkjanna fyrir því að önnur lönd „framleiði vörurnar okkar, steli fyrirtækjunum okkar og eyðileggi störf okkar“.
Leggja á 20% innflutningsgjöld á fyrstu 1,2 milljón þvottavélanna á fyrsta árinu og 50% innflutningsgjöld á allan umframfjölda. Eftir þrjú ár lækka gjöldin síðan niður í 16% fyrir 1,2 milljónir velja og 40% á rest. Innflutningsgjöld á innfluttar sólarrafhlöður verða hins vegar 30% fyrsta árið, en lækka niður í 15% eftir fjögur ár.