Íslenskt efnahagslíf á góðri leið

Brynja Baldursdóttir, framkvæmdastjóri Creditinfo.
Brynja Baldursdóttir, framkvæmdastjóri Creditinfo. mbl.is/Hanna

Allt frá árinu 2010 hefur Creditinfo tekið saman lista yfir fyrirtæki sem mæta ákveðnum skilyrðum um ábyrgan og arðbæran rekstur. Fyrirtækin sem standast umræddar skorður hljóta í kjölfarið nafnbótina „Framúrskarandi fyrirtæki“ og telst listinn til tíðinda í íslensku atvinnulífi ár hvert. Það þykir enda eftirsóknarvert að komast á listann og vera fyrirtækja á meðal framúrskarandi fyrirtækja landsins skiptir raunverulegu máli, eins og Brynja Baldursdóttir, framkvæmdastjóri Creditinfo, segir frá.

Aldrei fleiri framúrskarandi

Það ber einna hæst tíðinda á listanum í ár að þar er að finna fleiri fyrirtæki en nokkru sinni, en þau eru 868 talsins. Stökkið milli ára er talsvert því fyrirtækin voru 624 í fyrra.

„Það er rétt, þetta er metfjöldi og aukningin milli ára auk þess meiri en áður hefur verið,“ segir Brynja um framúrskarandi fyrirtæki ársins 2017. „Frá því við hófum að taka þennan lista saman árið 2010 hefur yfirleitt fjölgað um nálega 100 fyrirtæki á milli ára. Nú eru þau um 230 og það er met.“

Á síðasta ári gerðist það í fyrsta sinn að fyrirtækjunum fækkaði á milli ára en Brynja segir að skýringuna á því megi rekja til þess að kröfurnar um skil á ársreikningi voru hertar. „Þar sváfu talsvert mörg fyrirtæki á verðinum, með þeim afleiðingum að þau duttu út af lista. Það er greinilegt að viðkomandi hafa gætt þess að það gerðist ekki aftur að þessu sinni.“

Fjöldinn í takt við tímann

Brynja rekur einnig metfjölda fyrirtækja á listanum til þess uppgangs sem er í efnahagslífi hérlendis um þessar mundir. „Við erum að sjá sterka stöðu fyrirtækja í geirum sem hingað til hafa ekki verið fyrirferðarmiklir á listanum yfir framúrskarandi fyrirtæki. Ég nefni sérstaklega byggingaverktakafyrirtæki í því sambandi en helstu lykiltölur hjá fyrirtækjum í þeim geira eru heilt yfir að batna talsvert milli ára. En annars erum við með breiðan og góðan þverskurð af íslensku atvinnulífi á listanum og sú staðreynd, ásamt þeim metfjölda sem listann prýðir að þessu sinni, er til marks um að íslenskt efnahagslíf er á góðri leið.“

Sem fyrr segir voru reglurnar um skil ársreikninga hertar á milli áranna 2015 og 2016. Engar breytingar voru hins vegar á skilyrðunum á milli tveggja síðustu ára.

En kemur ef til vill til greina að herða reglurnar fyrir næsta reiknisskilaár, með hliðsjón af því hve mörg fyrirtækin eru orðin? Eða má heildartalan ef til vill alveg ná fjögurra stafa tölu ef því er að skipta?

Brynja brosir við og augljóst er að hún er ekki að heyra þessa hugmynd í fyrsta skipti.

„Þetta er umræða sem er tekin á hverju ári. Niðurstaðan er alltaf sú sama, kröfurnar eru sanngjarnar og draga vel fram fyrirtæki sem eru í sterkum og stöðugum rekstri. Þessi skilyrði hafa líka sannað sig. Bæði þegar við skoðum þau á fyrirtæki árin fyrir hrun, en þau fyrirtæki komu mun betur út úr hruninu en heildin, en líka þegar við skoðum vanskilahlutfall þeirra fyrirtækja sem hafa verið á listanum gegnum árin. Við höfum uppfært krónutölu um eigið fé í takt við verðlagsvísitölu og bætt við kröfum um ársreikningaskil á réttum tíma samkvæmt lögum, en skilyrðin hafa annars staðið nokkuð óbreytt. Mér þykir líka vænt um það skilyrði að aðeins er gerð krafa um jákvæða rekstrarniðurstöðu þar sem við erum ekki að verðlauna fyrir mikinn hagnað, heldur traustan rekstur. Vissulega getur einhverjum þótt fjöldinn orðinn helst til mikill en staðreyndin er bara sú að fleiri fyrirtækjum er að ganga betur.“

Það skiptir máli að vera framúrskarandi fyrirtæki

Að sögn Brynju fylla 84 fyrirtæki þann sérstaka úrvalsflokk að hafa verið á listanum yfir framúrskarandi fyrirtæki Íslands á hverju ári frá upphafi. Hún segir fyrirtæki sækjast eftir veru á listanum og augljóst að það skipti máli að komast á hann.

„Það felst vitaskuld ákveðin yfirlýsing í því að vera framúrskarandi fyrirtæki. Það sýnir að fyrirtækið er rekið með ábyrgum og ábatasömum hætti, og fjármálin eru gagnsæ með tilliti til skila á ársreikningum. Þetta skapar þeim ákveðið „goodwill“ og það er litið með velþóknun til viðkomandi fyrirtækja fyrir bragðið. En auk þess skapar þetta raunverulegt traust milli fyrirtækja og þau sem halda sér á meðal framúrskarandi fyrirtækja ár eftir ár njóta oft fyrirgreiðslu, sérkjara og sveigjanleika af því samstarfsaðilar meta það sem svo að þarna séu ábyrgir aðilar á ferð. Það á við um bæði viðskiptavini og birgja. Þetta er því ekki bara tengt huglægu mati og almenningsáliti, heldur getur þetta haft raunveruleg áhrif á afkomuna, í meiri eða minni mæli.“

Samfélagsleg ábyrgð og nýsköpun í atvinnulífinu

Í ár er einu fyrirtæki á listanum veitt verðlaun fyrir nýsköpun í starfsemi sinni, nokkuð sem Brynja segir að sé mjög mikilvægt í allri starfsemi. „Nýsköpun er nauðsynleg í öllum geirum atvinnulífsins, hvort sem um ný eða rótgróin fyrirtæki er að ræða. Hugmyndauðgi, þróun og sköpun er einfaldlega grunnurinn að því að hér dafni gott og blómlegt samfélag. Það er mjög gaman að fyrirtækið sem hlýtur viðurkenninguna í ár tengist sennilega ekki nýsköpun í hugum fólks almennt. Engu að síður eru verðlaunin mjög verðskulduð og fyrirtækið afskaplega vel að þeim komið. Það er gaman að geta vakið athygli á því.“

Verðlaun fyrir samfélagslega ábyrgð eru veitt í fyrsta sinn í ár og Brynja segir það tímabært.

„Samfélagsleg ábyrgð fyrirtækja er einfaldlega svo mikilvæg í atvinnulífinu að það er brýnt að beina kastljósinu að þeim sem eru að gera vel á þessum vettvangi,“ segir Brynja. „Fyrirtækin á listanum gegna mjög mikilvægu hlutverki í íslensku efnahagslífi og okkur fannst mikilvægt að leggja áherslu á það og hvað ábyrgð þeirra er í rauninni mikil. Það þarf líka að eyða þeirri mýtu að það sé á kostnað hagnaðar hjá fyrirtækjum ef þau sýna samfélagslega ábyrgð. Þar á ég við að þau sýni ábyrgð í umhverfismálum, jafnréttismálum og fleiri slíkum málaflokkum. Það er rík vitundarvakning meðal almennings hvað þessi mál varðar og fyrirtæki sem standa sig vel uppskera að sama skapi því fólk beinir viðskiptum sínum í auknum mæli að þeim sem standa framarlega á sviði samfélagslegrar ábyrgðar. Það er því í sjálfu sér ekki rétt að tala um kostnað í þessu sambandi heldur miklu frekar fjárfestingu sem skilar sér til skemmri og lengri tíma.“

Þessi grein birtist
í Morgunblaðinu
Áskrifendur:
Þessi grein birtist
í Morgunblaðinu
Áskrifendur:
Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK