Fyrsti Zip-rafbíllinn á Íslandi

Fyrirtækið Zipcar og Orkustofnun hafa gert samkomulag um sérmerkt stæði fyrir Zip-rafbíl við hús Orkustofun á Grensásvegi.

Allir meðlimir Zipcar geta bókað rafbílinn og notað hann til dæmis til að skreppa á fundi, fara í búðina, og svo framvegis eftir þörfum.

Þetta kemur fram í tilkynningu.

„Ef við ætlum að ná markmiðum okkar í minnkandi losun koltvísýrings í samgöngum þurfum við annars vegar að innleiða nýja orkugjafa og nýja tækni. Um leið þurfum við að finna nýjar leiðir til þess að nýta í botn fjárfestingu okkar í bílaflotanum og skapa okkur um leið frelsi til þess að nota þann samgöngumáta sem hentar okkur hverju sinni. Rafknúinn deilibíll hlýtur að vera rétt skref í þessa átt,“ segir Guðni A. Jóhannesson orkumálastjóri, í tilkynningunni.

Þar segir að Zipcar á Íslandi sé byltingarkennd nýjung í ferðamáta innan höfuðborgarsvæðisins. Meðlimir hafa aðgang að bílum allan sólarhringinn á skilgreindum stæðum hér og þar um borgina.

Meðlimir bóka Zipcar með appi í símanum, sækja hann á merkt stæði og skila honum svo aftur þegar erindinu er lokið.

• Blogga um frétt