Olíufélagið N1 hagnaðist um 76 milljónir króna á fyrsta ársfjórðungi þessa árs samanborið við 225 milljónir á sama tímabili á síðasta ári.
Rekstrarhagnaður fyrir afskriftir nam 400 milljónum á ársfjórðungnum samanborið við 521 milljón í fyrra. Selt magn af bensíni og gasolíu minnkaði um 2,2% á milli ára sem skýrist af aukinni samkeppni á einstaklingsmarkaði, að því er kemur fram í tilkynningu um uppgjörið til Kauphallarinnar
Framlegð af vörusölu minnkaði um 1,0% á fyrstu þremur mánuðum ársins. Eigið fé var 13.873 milljónir króna og eiginfjárhlutfall 49,0% í lok fjórðungsins.
Birgðir hækka um 5,4% á milli ára og er skýringin hærra heimsmarkaðsverð á olíu og aukin umsvif í sölu á flugeldsneyti.
EBITDA-spá fyrir árið 2018 er óbreytt og gerir ráð fyrir að EBITDA muni verða á bilinu 3.500 til 3.700 milljónir króna að undanskildum kostnaði við fyrirhuguð kaup á Festi hf. Sú spá byggir á því að olíuverð verði tiltölulega stöðugt og að gengi Bandaríkjadals verði í kringum 102 krónur.
N1 ákvað í apríl að afturkalla samrunatilkynningu sína varðandi kaup félagsins á Festi hf., sem rekur meðal annars Krónuverslanirnar. Samkeppniseftirlitið hefur haft kaupin til rannsóknar að undanförnu og var rannsókn málsins á lokstigi. Ætlar N1 að tilkynna aftur um samrunann og leggja fram tillögur að skilyrðum sem ætlað er að eyða þeim samkeppnishindrunum sem Samkeppniseftirlitið telur að stafað gætu af samrunanum.