Síminn hagnaðist um 887 milljónir

Síminn hagnaðist um 887 milljónir króna á fyrsta fjórðungi þessa árs samanborið við 774 milljónir á sama tímabili í fyrra. 

Tekjur námu 6.874 milljónum króna samanborið við 6.723 milljónir króna á sama tímabili 2017 og hækka því um 151 milljón króna eða 2,2%.

Rekstrarhagnaður fyrir afskriftir og fjármagnsliði EBITDA nam 2.231 milljónum króna. Hann var 2.099 milljónir króna á fyrsta fjórðungi ársins 2017 og hækkar því um 132 milljónir króna eða 6,3% á milli ára. EBITDA hlutfallið er 32,5% fyrir fyrsta ársfjórðung 2018 en var 31,2% á sama tímabili 2017.

Handbært fé frá rekstri án vaxta og skatta nam 2.390 milljónum króna en var 2.427 milljónir króna á sama tímabili 2017. Eftir vexti og skatta nam handbært fé frá rekstri 2.043 milljónum króna en 2.096 milljónum króna í á fyrsta fjórðungi síðasta árs. 

Eiginfjárhlutfall Símans hf. var 61,4% í lok 1F 2018 og eigið fé 37,2 milljarðar króna.

Í tilkynningu um ársfjórðungsuppgjörið er haft eftir Orra Haukssyni, forstjóra Símans, að stóraukin gagnanotkun erlendra ferðamanna á Íslandi hafi valdið því að reikitekjur hafi náð þeim upphæðum sem þær voru í á sama fjórðungi í fyrra. 

Þá segir Orri að íslensk fyrirtæki hafi haldið nokkuð að sér höndum undanfarna mánuði í innkaupum á upplýsingatæknivörum. Sensa hafi orðið fyrir áhrifum af þessari sveiflu í fjórðungnum en fastir þjónustusamningar og verkefnastaðan gefi góðar væntingar um framhaldið.

• Blogga um frétt