Bandaríski fjárfestingarsjóðurinn Eaton Vance Management á um 5,5% hlut í Tryggingamiðstöðinni eftir umtalsverð viðskipti í gær.
Þetta kemur fram í tilkynningu til Kauphallarinnar sem ber að senda út þegar eignarhlutur í skráðu hlutafélagi fer undir eða yfir 5% þröskuldinn.
Sjóðurinn keypti um 3,4 milljónir hluta í Tryggingamiðstöðinni og fjölgaði þannig hlutum í sinni eigu úr 33,7 milljónum í 37,1 milljón. Það jafngildir 5,47% hlut í tryggingafélaginu og nemur markaðsvirðið 1.245 milljónum króna miðað við 33,55 krónur á hlut.
Fyrir á Eaton Vance 3,6% í Eimskipi, 3,3% í Reitum, 3,5% í Högum, 3% í Sjóvá, 2,6% í Regin, 1,7% í HB Granda, 3,4% í VÍS, 1,1% í Eik og 3,2% í Símanum samkvæmt upplýsingum um stærstu hluthafa fyrirtækja í Kauphöllinni frá því í apríl.