Íhuga yfirtöku á Norwegian

Hlutabréf í Norwegian hækkuðu í morgun um nær 10% eftir að greint var frá því að þýska flugfélagið Lufthansa væri að skoða möguleikann á að taka norska félagið yfir. 

Financial Times greinir frá og byggir fréttina á ummælum, Carsten Spohr, forstjóra Lufthansa í þýska dagblaðinu Sueddeutsche Zeitung. „Þessa stundina eru allir að tala við alla. Það verður önnur bylgja samþjöppunar. Það þýðir að við erum líka í sambandi við Norwegian,“ sagði Spohr.

Frétt af mbl.is

Eigandi BA vill gera tilboð í Norwegian

Norwegian hefur átt í viðræðum við nokkra mögulega kaupendur. Flugsamsteypan IAG, sem á meðal annars British Airways, keypti 4,6% í Norwegian í apríl og lagði inn tvö yfirtökutilboð en báðum var hafnað af stjórn Norwegian. 

Rekstrartekjur Norwegian á fyrstu þremur mánuðum ársins hækkuðu um þriðjung frá sama tímabili á síðasta ári og farþegum fjölgaði um 12%.

• Blogga um frétt