Smíða þurfi 43.000 flugvélar á 20 árum

Framleiða þarf 43.000 nýjar flugvélar á næstu tveimur áratugum, samkvæmt Dennis Muilenberg, aðalframkvæmdastjóra bandaríska flugvélaframleiðandans Boeing.

Hann kynnti þessa uppfærðu spá fyrirtækisins fyrir blaðamönnum í London í dag, en Farnborough-flugsýningin hefst í Bretlandi á morgun.

„Við höldum áfram að sjá mikinn vöxt á flugmarkaðnum,“ hefur AFP-fréttaveitan eftir Muilenberg, sem bætti við að hann teldi að heimurinn þyrfti 43.000 farþegaflugvélar á næstu tuttugu árum, sem er meira en flugfélagið gerði ráð fyrir í fyrra.

Airbus býst við enn meiri vexti

Helsti keppinautur Boeing, evrópski flugvélaframleiðandinn Airbus, kynnti framtíðarmat sitt í síðustu viku og þar á bæ eru væntingarnar um vöxt flugbransans enn meiri.

Airbus telur nefnilega að smíða þurfi 48.000 flugvélar á næstu 20 árum, þar sem spurn eftir flugi aukist sökum vaxandi hagkerfa og lággjaldaflugfélaga.

Sú tala er samkvæmt frétt AFP meira en tvöfaldur fjöldi allra farþegaflugvéla sem nú eru í notkun.

Flugrisarnir tveir, Boeing og Airbus, mæta með sínar nýjustu flugvélar á flughátíðina í Farnborough, en þar munu fyrirtækin bítast um að selja flugfélögum afurðir sínar.

• Blogga um frétt