„Í kjölfar loka rannsóknar SRS hefur 57 málum verið vísað til héraðssaksóknara þar eð rannsókn hefur leitt í ljós stórfelld undanskot.“ Þetta kemur fram í svari fjármálaráðherra við fyrirspurn Oddnýjar Harðardóttur vegna rannsóknar skattrannsóknarstjóra á Panamagögnunum.
Ríkið keypti gögnin árið 2015 en embætti skattrannsóknarstjóra hefur lokið rannsókn á 89 málum og 14 eru enn í rannsókn. Vantaldir undandregnir skattstofnar nema alls um 15 milljörðum króna.
„SRS hefur lokið rannsókn í alls 89 málum sem tengjast svonefndum Panamagögnum. Er þar hvort tveggja horft til mála er lúta að skattskilum þeirra er beint koma fram í nefndum gögnum sem og til þeirra mála sem afleidd eru og gerð hefur verið grein fyrir hér að framan. Alls eru 14 mál enn í rannsókn, þar af sjö afleidd mál. Fimm þeirra eru á lokastigi rannsóknar,“ segir í svari fjármálaráðherra.
Enn fremur kemur fram í svari ráðherra að það megi ætla að ástæða sé til að hefja rannsókn á nokkrum málum til viðbótar. Rannsóknir í 12 málum hafa verið felldar niður, þar á meðal sökum þess að grunur hefur ekki reynst á rökum reistur eða vegna þess að ekki hefur reynst unnt að upplýsa mál með fullnægjandi hætti.
Svar fjármálaráðherra má sjá hér.