Arion banki gaf í dag út skuldabréf eiginfjárþáttar 2 að fjárhæð 500 milljónir sænskra króna. Skuldabréfin, sem eru fyrsta víkjandi útgáfa Arion banka, eru með fljótandi vexti 310 punkta ofan á millibankavexti í sænskum krónum.
Skuldabréfin eru gefin út til 10 ára með innköllunarheimild af hálfu útgefanda eftir 5 ár (10NC5), að því er bankinn greinir frá í tilkynningu.
Þar segir enn fremur, að skuldabréfin teljist til eiginfjárþáttar 2 samkvæmt lögum um fjármálafyrirtæki.
„Útgáfa skuldabréfanna styrkir eiginfjárgrunn bankans og er áfangi í vegferð hans að ná fram hagkvæmri skipan eiginfjár.
Gert er ráð fyrir að útgáfan fái lánshæfiseinkunnina BBB- frá S&P Global Ratings. Skuldabréfin verða gefin út undir EMTN-útgáfuramma bankans og er stefnt að töku skuldabréfanna til viðskipta í kauphöllinni í Lúxemborg 22. nóvember 2018.
Nordea, Swedbank og SEB sáu um útgáfuna fyrir hönd bankans,“ segir í tilkynningunni.