Nafni aflþynnuverksmiðjunnar Becromal í Eyjafirði hefur verið breytt í TDK Foil Iceland, en það er í samræmi við nafn móðurfélagsins sem heitir TDK corporation. Breytingin tók gildi fyrr í mánuðinum og hefur nýtt skilti verið sett upp utan á verksmiðjunni með nýju nafni hennar.
Í tilkynningu kemur fram að nafnabreytingin sé liður í að samræma markaðsstarf TDK Group. Þá segir jafnframt að nýtt nafn muni ekki hafa nein áhrif á verksmiðjuna, stjórnun hennar, starfsemi eða framleiðslu.
Íslenska félagið var stofnað árið 2009 og er dótturfélag TDK Foil Italy S.p.A sem er með höfuðstöðvar nálægt Mílan á Ítalíu. Fyrirtækið hér á landi framleiðir aflþynnur fyrir rafþétta sem eru notaðir í margvíslegum iðnaði, meðal annars í vind- og sólarorku. Hjá fyrirtækinu starfa 104 manns.
TDK er rafeindatæknifyrirtæki með aðsetur í Tókýó í Japan og rekur það framleiðslufyrirtæki, hönnunar- og söluskrifstofur í Asíu, Evrópu og í Norður-og Suður-Ameríku. Í áætlunum sínum fyrir yfirstandandi ár gerir gerir TDK ráð fyrir að selja framleiðsluvörur fyrir um 12 milljarða USD. Hjá fyrirtækinu starfa um 103.000 manns um allan heim.