Töluverður munur er á útgjöldum ferðamanna eftir því hvaða staði á landinu þeir heimsækja.
Í nýlegri könnun sem gerð var fyrir Ferðamálastofu kom í ljós að útgjöld erlendra ferðamanna voru hæst í Reykjavík, eða um 38.000 kr. á sólarhring að meðaltali, en minnst á Hvammstanga þar sem reikna má með að dæmigerður ferðalangur eyði um 8.000 kr. á dag.
Lilja B. Rögnvaldsdóttir, sérfræðingur hjá Rannsóknasetri Háskóla Íslands á Húsavík, hafði umsjón með framkvæmd könnunarinnar. Voru bæði opnar og lokaðar spurningar lagðar fyrir ferðamenn á átta stöðum á landinu og svöruðu að jafnaði 400-500 manns á hverjum stað.
Könnunin náði til Reykjavíkur, Reykjanesbæjar, Víkur í Mýrdal, Egilsstaða, Húsavíkur, Hvammstanga, Ísafjarðar og Stykkishólms, en um hana er fjallað í Morgunblaðinu í dag.