Tiltölulega hófleg áhætta er í fjármálakerfinu að mati fjármálastöðugleikaráðs en ráðið fundaði í fimmta sinn á þessu ári í dag. Hefur áhættan lítið breyst frá síðasta fundi ráðsins. Áfram slaknar á spennu í þjóðarbúskapnum en nokkur óvissa ríkir um framvinduna í ferðaþjónustu og áhrif kjarasamninga á efnahagslífið.
„Áfram er upptaktur í fjármálasveiflunni og skuldir vaxa nú hraðar en landsframleiðsla. Fasteignaverð hefur haldið áfram að hækka þótt dregið hafi nokkuð úr hækkun verðs á íbúðarhúsnæði. Innlendir flugrekendur hafa verið í mótvindi, en bein áhrif af mögulegu áfalli á fjármálakerfið eru talin takmörkuð,“ segir í tilkynningu. Viðnámsþróttur viðskiptabankanna sé talsverður. Eiginfjárhlutföll þeirra séu nokkuð yfir kröfum Fjármálaeftirlitsins og lausafjárstaða þeirra er vel yfir lágmarki samkvæmt reglum Seðlabankans.
„Þá er geta þjóðarbúsins til að takast á við áföll góð, m.a. vegna góðrar ytri stöðu, stórs gjaldeyrisforða og lágrar skuldastöðu hins opinbera og einkageirans. Svigrúm hagstjórnar til að mæta áföllum er einnig talsvert þar sem afgangur er á ríkissjóði, skuldir hins opinbera eru lágar í sögulegu samhengi og nafnvextir Seðlabankans töluvert frá núlli.“
Fjallað var um hraða þróun fjártækni sem kallar á aukinn viðbúnað varðandi net- og upplýsingaöryggi. Ennfremur hvernig treysta mætti sem best innlenda greiðslumiðlun í ljósi þeirrar þróunar sem væntanleg er. „Samþykkt var að beina tilmælum til Fjármálaeftirlitsins um að hækka sveiflujöfnunarauka um 0,25 prósentur, úr 1,75% í 2%. Hækkunin tekur gildi 12 mánuðum eftir ákvörðun Fjármálaeftirlitsins, fylgi stofnunin tilmælunum.“
Fundardagar fjármálastöðugleikaráðs á árinu 2019 verða 1. apríl, 21. júní, 24. september og 17. desember.