Gjaldeyrisforði Seðlabankans óx um um 12,4 milljarða króna í októbermánuði og stendur um þessar mundir í 838 milljörðum króna.
Hreinn gjaldeyrisforði, þ.e. erlendar eignir hans að frádregnum erlendum skammtímaskuldum, nam 838 milljörðum í lok október, samanborið við 825,7 milljarða í lok septembermánaðar.
Þetta kemur fram í tölum frá Seðlabanka Íslands. Þar kemur einnig fram að nettóútgreiðslur gjaldeyriseigna Seðlabankans og ríksisjóðs fyrir næstu 12 mánuði séu áætlaðar 0,017 milljarðar króna í lok október.
Erlendur gjaldeyrir er langstærstur hluti eigna gjaldeyrisforðans eða 794,4 milljarðar króna. Þar af eru erlend verðbréf 598,8 milljarðar og seðlar og innstæður 195,6 milljarðar. Stærstur hluti innstæðna er vistaður hjá öðrum seðlabönkum, Alþjóðagreiðslubankanum í Basel og Alþjóðagjaldeyrissjóðnum, eða 192,8 milljarðar króna.
Af öðrum eignum Seðlabankans má nefna gull sem í dag er verðlagt á 11,9 milljarða króna.