Seðlabanki Íslands unir úrskurði kærunefndar jafnréttismála sem komst að þeirri niðurstöðu að bankinn hefði brotið jafnréttislög þegar Stefán Rafn Sigurbjörnsson var ráðinn upplýsingafulltrúi hjá bankanum í sumar. Kærunefnd jafnréttismála komst að þeirri niðurstöðu 17. desember síðastliðinn.
Bankinn vill að öðru leyti ekki tjá sig um úrskurðinn að sinni en samkvæmt upplýsingum frá bankanum verður það að koma í ljós hvort, og þá hvers konar, aðgerða verði gripið til af hálfu bankans í kjölfar úrskurðarins, til að mynda varðandi mögulegar greiðslur miskabóta.
Gunnhildur Arna Gunnarsdóttir, fyrrverandi upplýsingafulltrúi Símans og núverandi dagskrárgerðarmaður á Rás 2 og blaðamaður á Læknablaðinu, kærði ráðninguna. Alls sóttu 51 um starfið hjá Seðlabankanum, en um nýja stöðu var að ræða.
Niðurstaða kærunefndarinnar er sú að Seðlabankinn hafi brotið gegn jafnréttislögum með því að hafa ekki sýnt fram á að aðrar ástæður en kynferði hafi legið til grundvallar ákvörðun um ráðningu í starfið. Þá telur nefndin sömuleiðis að Gunnhildur hafi „staðið umræddum karli framar“ varðandi bæði menntun og hins vegar reynslu af kynningarstarfi og fjölmiðlun.