Yfirstjórn þýska flugfélagsins Lufthansa samþykkti í dag aðgerðaáætlun til að bjarga flugfélaginu frá gjaldþroti. Flugfélagið er því einu skrefi frá því að tryggja sér níu milljarða evra ríkisaðstoð, eða jafnvirði 1.395 milljarða króna.
Hluthafar Lufthansa þurfa nú að samþykkja aðgerðaáætlunina á hluthafafundi sem fer fram 25. júní. „Við ráðleggjum hluthöfum okkar að fara þessa leið,“ sagði formaður yfirstjórnarinnar, Karl-Ludwig Kley, í yfirlýsingu.
Í lok apríl gaf Lufthansa út viðvörun þess efnis að lausafé þess myndi klárast innan fáeinna vikna, fengi það ekki ríkisaðstoð og óskaði það í kjölfarið eftir aðstoð frá ríkisstjórnum Þýskalands, Austurríkis, Belgíu og Sviss.
Framkvæmdastjórinn Carsten Spohr tjáði starfsfólki sínu jafnframt að félagið væri að tapa einni milljón evra á hverri klukkustund sem liði.
Fyrir viku var greint frá því að flugfélaginu yrði veitt ríkisaðstoð og fékk það tilboð frá stjórnvöldum þess efnis. Það fól í sér aðstoð að fjárhæð 9 milljarða evra en í staðinn myndu hluthafar þurfa að gefa eftir 20% hlut í flugfélaginu.
Yfirstjórn Lufthansa hafnaði því boði og fór fram á að viðræður héldu áfram. Nú hefur yfirstjórnin gengið að öðru tilboði en ekki er ljóst hvaða skilyrðum það er háð.