Sigurður Þór Helgason, eigandi verslunarinnar DJI, segir drónamarkaðinn á Íslandi hafa stækkað mikið að undanförnu. Með sama áframhaldi verði salan í verslun hans tvöfalt til þrefalt meiri í ár en í fyrra. Gangi það eftir gæti salan nálgast 700 milljónir króna í ár.
Sigurður Þór segir það ekki síst að þakka eldgosinu við Fagradalsfjall en strax morguninn eftir að það hófst hafi myndast röð í verslun DJI á Lækjargötu. Síðan muni endurræsing ferðaþjónustunnar styðja markaðinn enn frekar.
Viðskiptavinir verslunar DJI spanna allt litrófið, allt frá almennum notendum og upp í sérfræðinga sem þurfa dýrari búnað. Dýrasti dróninn kostar um sex milljónir með fylgibúnaði. Fylgja þá meðal annars þrjár myndavélar. Ein hefur 200-faldan aðdrátt, önnur er hitamyndavél og sú þriðja er hefðbundin myndavél. Geta þær allar tekið upp í einu. Slíkur dróni gagnast vel við eftirlit og við leit að týndu fólki.
Sigurður Þór hefur mikla ástríðu fyrir drónum og hafa upptökur hans af íslensku landslagi meðal annars ratað í þáttaraðir á Netflix.
Sigurður Þór segir stefna í að verslun hans í Lækjargötu verði senn eina viðurkennda verslun DJI á Norðurlöndum. DJI sé að auka kröfurnar og hverfa um leið frá samningum við aðrar verslanir á Norðurlöndum. Í þessu felist mikil viðurkenning fyrir verslun hans á Íslandi.