Ánægður með árið í heild sinni

„Við unnum samkvæmt áætlun. Niðurstaðan er í takti við það sem við gerðum ráð fyrir. Aðgerðir sem við réðumst í á árinu, eins og fjárfesting í birgðum og umfangsmikil uppbygging á erlendum mörkuðum, með opnun flaggskipsverslunar á Regent Street í London og mikilli erlendri markaðssókn, voru kostnaðarsamar, en markmiðin náðust og ég er því mjög ánægður með árið í heild,“ segir Helgi.

Meðvituð ákvörðun

Hann segir að meðvitað hafi verið tekin ákvörðun um að kaupa mikið inn af vörum sem vitað var að yrðu áfram í vörulínunni. „Við töldum víst að aðfangakeðjur gætu brostið vegna faraldursins. Því yrði betra að eiga meira en minna, til að verða ekki fyrir tekjutapi ef flík seldist upp.“

Hann segir þetta hafa gefist vel. „Eitt dæmi er jakki sem átti að koma í mars í fyrra en kom svo ekki fyrr en í nóvember. Það hefði verið slæmt að missa margra mánaða sölu á þessari tilteknu flík. Við urðum því ekki fyrir miklu tekjutapi í fyrra út af vöruskorti.“

Fjárfestingu ársins má glöggt sjá í ársreikningi félagsins. Í byrjun 2022 var félagið skuldlaust en í lok árs skuldaði það 1,6 milljarða króna. Um 300 m.kr. einskiptiskostnaður var í tengslum við innkomu á breska markaðinn og opnun nýrrar verslunar.

Helgi segir markmið um að halda grunnrekstrinum góðum, hafa náðst. „Við erum með fína tekjuaukningu milli ára, eða 17%, og góða framlegð.“

Tekjurnar á árinu voru 5,6 milljarðar króna en höfðu verið 4,8 milljarðar árið á undan.

Viðtökur við nýrri verslun 66° Norður við Regent Street í Lundúnum fóru fram úr björtustu vonum. Thomas Meyer/OSTKREUZ

Gríðarleg vinna

Helgi segir að viðtökur við nýju versluninni í Lundúnum hafi farið fram úr björtustu vonum. Að baki velgengninni liggi þó gríðarleg vinna.

Lestu meira um málið í þriðjudagsblaði Morgunblaðsins.